Фитыр сәдакасы күпме булырга һәм кемнәргә бирелергә тиеш?  

Әлеге сорауны без Азнакай районы мөхтәсибе Азат хәзрәт Талибуллинга юллап, аннан түбәндәге җавапны алдык.

– Рамазан аенда фитыр сәдакасын бирү вәҗиб (тиеш) санала. Һәр мөселман фитыр сәдакасы бирергә бурычлы. Аны Рамазан аенда өләшәләр, моның өчен иң хәерле вакыт – Ураза гаете көнне бәйрәм намазына кадәр. Гает намазыннан соң ул гади сәдака санала.

Фитыр сәдакасын азык-төлек белән дә, шуның бәясе кадәр итеп акчалата бирергә дә мөмкин. Ул бүлеп өләшенми, күләме зур булмавы сәбәпле, аны бары тик бер кешегә бирәләр. Бер фәкыйрьгә бердән артык фитыр сәдакасы бирергә дә була. Сәдака биргәндә аны бирүең турында ният ителә, моны ишетелерлек итеп әйтү шарт түгел.

Сәдаканы аз керемле, мохтаҗ, күп балалы гаиләләргә, кереме булмаган авыруларга, янгыннан каза күрүчеләргә һ.б. бирәләр.  

Фитыр сәдакасының минималь күләме былтыргы кебек – 100 сум итеп билгеләнде, ә зәкят түләргә мөмкинлеге булучыларга фитыр сәдакасы 600 сумнан тәкъдим ителә.