Әгерҗе мәчете авылдашларны изге юлда берләштерә

Һәр елны авылыбыз мәчетенә Ифтар мәҗлесенә җыела авылым халкы. Бу гамәл иң беренче чиратта Аллаһы тәгалә ризалыгы өчен, илебезнең, Татарстаныбызның киләчәге өметле булсын, тынычлык булсын дигән ният белән үткәрелә.

Менә әкрен генә атлап түбәтәйләрен кырын салып авыл агайлары, яулыкларын матур итеп бәйләп әби-апалары мәчеткә агыла.

Димәк, авыл яши. Бик матур куренеш. Мәчет тулы халык. Бер-берсе белән “Әссаләмәгаләйкүм” дип кул биреп күрешеп, хәл белешеп түргә узалар..

Авылым имамнары вәгазь укый, изге Корьән сүрәләрен бәян итә. Дингә, намазга якынаючылар саны елдан ел арта баруы сөенечле хәл. Мәчетебездә гарәп телен Гөлүсә абыстай алып бара, төрле сыйныфларда укучылар саны арта бара…

Өстәлләр мулдан, сый-нигъмәттән сыгылып тора. Аш-су осталары апаларыбызның чын күңелдән, “бисмилла” әйтеп әзерләнгән ризыклары искиткеч тәмле. Бик зур рәхмәт аларга!

Әлеге мәҗлесне уздыруда ярдәм иткән Әгерҗе авыл советы җирлегенә, ветераннар советы оешмасына, мәчет әһелләренә рәхмәт сүзләрен җиткерәсе килә.

Авылым халкы, кунакларына алып килгән күчтәнәчләре, хәер-сәдакалары, кылган догалары өчен зур рәхмәт!

Рамазан аенда барыбызга да игелекле гамәлләр кылуда ярышып, әҗер-савап алырга насыйп булсын! Әмииин...

Гөлгенә Ибраһимова, Әгерҗе авылы