Азнакайда үз теләге белән махсус хәрби операциягә китүчеләрне озаттылар

Илебезне саклап, махсус хәрби операциягә барырга карар кылган герой ир-егетләрне озатырга гаиләләре, якыннары, район җитәкчелеге дә килгән иде. Район башлыгы Марсель Шәйдуллин аларга изге теләкләрен җиткереп, туган якларга исән-сау әйләнеп кайтуларын теләде.

– Үзегез шундый карар кылып, бүген илебезне якларга китәсез. Бүген мин аеруча хатыннарыгызга, сезне тәрбияләп үстергән әти-әниләрегезгә рәхмәт сүзләремне җиткерәсем килә. Аларны да, сезне дә игътибар һәм ярдәмнән ташламабыз, бары тик үзегез исән-сау булыгыз да, тизрәк әйләнеп кайтыгыз, – диде Марсель Шәйдуллин.

Озату мизгелләре дә дулкынландыргыч булды: якыннары егетләр яныннан бер мизгелгә дә читкә китмичә, үзләренең изге теләкләрен әйтеп калырга тырышты. Ир-егетләр, әниләрен, хатыннарын, балаларын кочакларына алып, “Бирешмәгез, сезнең хәлләр әйбәт булса, безнең барысы да яхшы булачак” дип юатканнан соң олы юлга кузгалдылар...