Азнакай мөселманнары Ураза гаетен бәйрәм итә

Бүген районыбызда мөэмин-мөселманнар өчен иң зур бәйрәмнәрнең берсе булган Ураза гаете билгеләп үтелде. 

Иртәнге сәгатьләрдән районыбыздагы барлык мәчетләрдә дә халык катнашында гает намазы укылды, вәгазьләр тыңланды,  моңлы тәкъбирләр әйтелде.

Шәһәребезнең Ак мәчетендә бәйрәм чарасы имам-мөхтәсиб Азат хәзрәт Талибуллинның вәгазе белән башланып китте. Мөселманнарны бәйрәм белән котлау өчен район башлыгы Марсель Шәйдуллин да килгән иде. Ул җыелган халыкны бәйрәм белән тәбрикләп, илләребезгә муллык, һәрбер гаиләгә татулык-иминлек теләде. 

- Казандагы җан өшеткеч фаҗигане барыбыз да күңелләребез аша уздырдык. Бөр гөнаһсыз сабыйлар, укытучылар мәрхүм булды. Мондый кайгыларны яңадан күрергә язмасын, ил-көннәребез тыныч һәм имин булсын. Баларыбыз исән-сау булсын, һәр ата-ана алар өчен тырыша, тәрбия бирә, укыта, алар өчен дип яши. Барыбызга да бәхетле тормыш телим, - диде Марсель Шәйдуллин.

Дин кардәшләребез өчен чәй табыны да әзерләнгән иде.