Азнакайда районыбыз укучыларының 44нче туристик слеты узды

Балалар иҗат үзәгенең туристик, төбәкне өйрәнү бүлеге районыбыз укучыларының 44нче туристик слетын үткәрде. Ул 30 майдан 1 июньгә кадәр Алферовка авылы янәшәсендә оештырылды. Слет барышында укучылар җәяүле турист сукмакларыннан үтте, тирә-якта ориентлашырга өйрәнде, табигать белемнәрен киңәйттеләр, туган якның байлыгын ачтылар, гүзәллеген хозур кылдылар... Анда барлыгы 10 команда составында 90лап укучы катнашты. Ярышларның төп хөкемдары В.Соколов таләпләрне аңлатканнан соң, бәйгеләр кызды. Көндезге көч сынашудан соң кичләрен барсы бергә җыелып, учак алдында җырлап күңел ачтылар. Регина Стрих оештырган бу чыгышлар һәммәсенең күңеленә хуш килде. Шушы 3 көн эчендә балалар үзләренә бик күп дуслар тапты. Җиңүчеләр бүләкләнде.