Азнакайда котычкыч авария: ире вафат була, хатыны һәм баласы могҗиза белән исән кала

Кешене күрәчәк йөртә дип юкка әйтмиләрдер. Төнлә туган авылын күрергә дип барган җиреннән авариягә очрап, һәлакәт урынында вафат булган 29 яшьлек егет хакында тагын ни диясең?

Шимбә көнне Октябрь Бүләк авылы янында булган җан өшеткеч юл-транспорт һәлакәте барыбызны тетрәндерде. Бу көнне 23.00 сәгатьтә "Деу Нексия" машинасы шоферы борылышта тизлекне сакламый һәм юл кырына әйләнеп каплана. Алган тән җәрәхәтләреннән ул урында ук һәлак була. Яшьнәп торган гомер әнә шулай мизгел эчендә өзелә. Куркынычсызлык каешын эләктергән хатын белән 2014 елгы бала каза күрми.