Азнакай халкы шәһәр ярминкәләрендә арзан бәягә продукция җыйган

Азнакай халкын районда җитештерелгән арзан бәяле экологик чиста продукция белән тәэми итү максатыннан шәһәрдә һәм Актүбә бистәсендә авыл хуҗалыгы ярминкәләре уздырыла.

Быел көзен инде шундый 12 ярминкә булып үтте. Бу вакыт эчендә "Шифа" сәүдә үзәге каршына һәм Актүбәнең базар мәйданына 41 тонна бодай, 5 тоннадан артык ит һәм башка продукция китерелгән. Бәяләр базарныкыннан күпкә ким.

Мәсьәлән, бәрәңгенең килосын 10-13 сумнан, кишерне - 12-15, суганны - 13, ә кәбестәне 10 сумнан сатып алып булган. Теләгән кеше төрле үсентеләр дә ала алган. Арзан бәягә авыл хуҗалыгы продукциясен сатуга "Таллы Бүләк", "Тукай", "Союз-Агро", "Габдрахмәнов Л.Г.", "Закирова Л.А." һәм башкалар зур өлеш кертте.