Азнакайда өлкәннәр дә волейбол ярата

Өлкән буынны физик күнегүләргә күбрәк тарту максатында Азнакай районындагы Клиентлар хезмәтенең өлкәннәрнең аралашу үзәге волейбол буенча уеннар оештырды. Волейбол мәйданчыгы да күршедә генә, шунысы җайлы. Уен-бәйгедә Клиент хезмәте белгечләре һәм үзәккә йөрүче өлкәннәр командалары көч сынашты.

– Волейбол – теләсә кайсы яшьтә уйнау өчен кулай спорт төре. Ул сихәтлекне генә ныгытып калмый, ә команда рухын үстерә, берләштерә, яңа дуслар таптыра, - ди Клиентлар хезмәте җитәкчесе Миләүшә Шәйдуллина. – Анда катнашкан өлкәннәребез гүя яшьлекләренә әйләнеп кайттылар. Алардагы дәрт, күңел күтәренкелегенә сокланырлык!

Уеннар бик җанлы барды. Аннан һәркем ел буена җитәрлек энергия алып китте, – дип хәбәр итә безгә баш белгеч-эксперт Ләйсән Шәйдуллина.