Җиңүчеләр һәм бәйрәм җылысы

Җиңүчеләрне тамашачылар билгеләде. Алар  aznakaevo-rt.ru сайтында  тавыш бирделәр. Бер генә катнашучы  да игътибардан читтә калмасын, матур  тәбрикләү сүзләрен ишетсен өчен бүләкләү тантанасы берничә көнгә сузылды.  Күп кенә балалар редакциягә әти-әниләре, тәрбиячеләре һәм укытучылары белән бергә килделәр.   Соңыннан баянга кушылып бергәләп  “Туган тел” җырын башкардылар. Бу – бәйрәмнең иң  тәэсирле, дулкынландыргыч  мизгелләре булды.

Тавыш бирү нәтиҗәләре буенча  җиңүчеләр түбәндәгечә билгеләнде:

• Габдрәшитова Айсель (6 яшь, “Карлыгач”шигыре)  405 тавыш;
• Гәрәева Ралия (“Бала белән күбәләк”, җитәкчесе Фәйрүзә Вахитова, 18 нче балалар бакчасы)   286 тавыш;
• Идиятуллина Мәдинә (5 яшь, “Йолдызчык” 6 нчы балалар бакчасы)  232 тавыш;
• Миннеханов Раян (8 яшь, 4 нче лицей, җитәкчеләре Ләйсән Имаметдинова, Гөлназ Сәлахова) – 169 тавыш.

 Барлык 30 катнашучы да  дипломнар һәм “Маяк” газетасының бүләкләренә ия булдылар.
Газетаның баш мөхәррире Фәрхәт Шәйхулов балаларга һәм аларның остазларына  рәхмәт белдерде:

Тукай шигырьләре яңгырый, балалар һәм өлкәннәр”Туган тел” җырын  җырлыйлар икән, димәк безнең телебез һәм мәдәниятебез яши. Мондый  бәйгеләр ул ярыш кына түгел, ә бәлки туган телебезне саклауга, балалар күңелендә аңа мәхәббәт уятуда зур әһәмияткә ия.  Һәр катнашучы балага һәм аларның әти-әнисе, остазларына тырышлыклары һәм күңел җылысы өчен зур рәхмәт.

 Конкурс “Яшьләр һәм балалар” милли проекты кысаларында узды.