Илсөя Галиева: "Актив тормыштан туктау - яшәүдән туктауга тиң"

Гомерен балалар тәрбияләүгә, аларга белем бирүгә багышлаган, лаеклы ялга чыккач та районның ветераннар советында җаваплы сәркатип вазифасын башкарган, "Супер әби", "Ел хатын-кызы" бәйгеләрендә катнашып җиңүләр яулаган Илсөя Галиеваны район чараларында, ветераннар белән очрашуларда, я булмаса урамда гына күрсәм дә, һәрчак аның тыйнаклыгына, пөхтәлегенә, мөлаем карашына игътибар итми калмыйм. Әйтәсе килгәнен ипләп, җайлап кына ирештерер, хәтере калган чакларда берәүгә дә күтәрелеп бәрелмәс. Көлгәндә күзләренә кадәр елмая кебек. "Супер әби" бәйгесендә "Назлы әби" номинациясе дә нәкъ менә аның образыннан чыгып уйланылгандыр төсле.

...Илсөянең бала чагы дәһшәтле сугыш елларына туры килә. Фашистлар илебезгә басып кергәндә 3-4 көнлек кенә сабый була әле ул. Укытучы гаиләсендә туган бала кечкенәдән әнә шулай тәрбияле, ипле, җаваплы булып үсми нишләсен. Ачлык, ялангачлык, җитмәүчелекне күргән буын вәкиле дә ул. Педагог эшчәнлеген 1964 елда балалар бакчасында тәрбияче булып башлый, Казан дәүләт педагогия институтын тәмамлый. Әйтүе генә ансат: 40 ел педагогик стажның 26 елы ачы язмышка дучар булган ятим балалар арасында үткән. Алар янәшәсендә нәкъ менә Илсөя апа кебек балалар яраткан, ипле, сабыр холыклы, көчле рухлылар гына кала аладыр.