Геройлар – безнең йөрәкләрдә

Чернобыль атом электр станциясендәге (ЧАЭС) һәлакәтенә 40 ел тулу уңаеннан Азнакайда митинг үтте.

Чернобыль трагедиясе дөньяга атом энергетикасының куркыныч ягын күрсәтте. Әмма бу фаҗига кеше рухының, бердәмлекнең, батырлыкның көчен дә ассызыклады. Азнакай җирлегендә дә андый батырлар бар – аларны хөрмәтләү, искә алу традициясе дәвам итә. Бу көн – 1986 елда дөнья тарихында иң эре техноген һәлакәтне бетерүдә катнашкан геройларга хөрмәт күрсәтү, шулай ук радиация корбаннарын искә алу көне.

Азнакай муниципаль районы башлыгы Марсель Шәйдуллин  митингны ачып,Чернобыльдәге батырлыкның бәһасе зур икәнен, ә нурланыш эскалациясен бетерүчеләрнең гамәлләре бөтен дөньяны коткаруга тиң булуын ассызыклады.

«Сезнең батырлыгыгыз һәм фидакарьлегегез онытылмас. Һәркайсыгыз – чын герой. Бүген сезгә тирән рәхмәт белдерәбез», – диде район башлыгы.

Аның фикерләренә  хәрби комиссар Руфат Гайнетдинов та кушылды. Ул елларның шаһиты булган Рәис Харисов та онытылмас вакыйгалар турында хатирәләрен яңартып, һәрдаим ярдәмнәре өчен район җитәкчелегенә һәм социаль яклау бүлеге хезмәткәрләренә рәхмәтен белдерде.

Митингның төп өлешендә бүләкләү тантанасы узды. Район башлыгы Чернобыль һәлакәтен бетерүдә актив катнашкан якташларга һәм аларның гаилә әгъзаларына бүләкләр, рәхмәт хатлары тапшырды.

Чернобыль һәлакәтендә һәлак булганнарны бер минут тынлык белән искә алдылар, каһарманнарыбыз истәлегенә куелган һәйкәлгә чәчәкләр салдылар.