Азнакайда тугыз катлы йорт үз ишекләрен ачты

Район тарихында иң беренче тугыз катлы, 62 фатирлы, заманча проект белән төзелгән, лифты да булган йорт сафка басты.

Йортта яшәячәк азнакайлыларга ачкычлар тапшыру тантанасында район башлыгы Марсель Шәйдуллин,  инвестор  Рәсим Галләмов, шәһәр башкарма комитеты җитәкчесе Эльвир Габдрахманов һәм башка җитәкчеләр, төзүчеләр һәм әлбәттә фатир хуҗалары катнаштылар.

“Бу йорт – Азнакайның күрке, иң биек, күркәм бинасы, визит карточкасы булып тора.  Рәхмәт Рәсим Зиннуровичка, төзүчеләргә. Алар һәрчак   позитив булып, бернигә карамастан йортны төзеп бетерделәр. Монда яшәү өчен бар шартлар да бар.  Барыгызны да котлыйбыз! Исән-сау, шатланып яшәргә, сабыйлар үстерергә язсын! Тирә-юнь гөрләп торсын!” – дип Марсель Шәйдуллин үзенең изге теләкләрен җиткерде.

Аның теләкләренә башка җитәкчеләр дә кушылдылар.  Ачкычлар тапшыру һәм тасманы кисеп йорт эченә узу –  күңелдә калырлык иң истәлекле минутлар булды.

“Шундый йортта яшәргә теләгән идек. Хыялыбыз тормышка ашты. Төзүчеләргә, җитәкчеләргә, йортны төзүдә зур көч куйган һәммә кешегә рәхмәтебезне белдерәбез”, – диде Наилә Вәлиәхмәтова.

Хәерле сәгатьтә. Бәхетле йорт булсын! Шунысын да өйтергә кирәк:  мондый йортларны  киләчәктә дә төзү планлаштырыла.