Җәүһәрия Шәрипованың шигырьләре

Тал чыбыгы

Сыгылмалы тал агачы

Үсә инеш ярында.

Тал ботагы – сыек чыбык

 Әле дә күз алдында.

Түшәмдәге тал чыбыгы

Кыек юлдан саклады.

Безнең тәрбияле булу

Димәк, шуны аклады.

Үстек тал бишегендә без,

Тәгәрәшеп  җәймәдә.

Тал кәрзингә җиләк җыйдык

Җылы, ямьле җәйләрдә.

Ихаталар булган иде

Үрелгән шул читәннән.

Ләкин онытылды инде

Читән койма күптәннән.

Матчаларда торса иде

Тал чыбыгы кисәтеп.

“Яхшы гына йөрегез! - дип

Чыккан саен искәртеп.

Тугры кычытканнар

Нинди авыл булган бу урында,

Калган бары нигез ташларың.

Җилләр генә йөри бөтерелеп,

Җилфердәтеп әрем башларын.

Җилләр йөри хатирәләр барлап,

Уңга-сулга сугылып, сарылып.

Читтән авылдашлар кайткалыйлар

Туып-үскән авылын сагынып.

Кычытканнар ташлап китмәгәннәр,

Кычытканнар тугры калганнар.

Карт тирәкләр  корып барсалар да,

Авыл эзен саклый алганнар.

Шул тирәкләр  һаман каршылыйлар

Җылы яктан кайткан кошларын.

Кычытканнар  һәр җәй каршы ала

Сагынып кайткан авылдашларын.

Җәүһәрия Шәрипова