Сабантуй батырына – кәҗә!

Җәй җиттеме - күңел Сабантуйларны көтә. Мәсгут авылының "Чишмә" балалар бакчасында милли бәйрәмебез аеруча үзенчәлекле үтте. Халкыбызның гореф-гадәтләрен борынгыдан саклап килгән бу олуг бәйрәмне Сөрән сугу йоласы белән башлап җибәрдек. Рияз чиккән сөлгеле колганы тотты, Руслан йомырка җыю өчен чиләген, ә кызлар, "Сабан туе - хезмәт туе..." дип җырлап, бүләкләрне өсти тордылар...

Бәйрәм уен-ярышлар белән бакчабызда дәвам итте, уйнап-көлеп, рәхәтләнеп ял иттек бу көнне. Бәйрәмгә кунак булып авылыбызның өлкән укытучылары Наилә һәм Газинур Сәгыйтовлар да чакырулы иде.

Иң кызыгы шунда: авылдашыбыз Клара әби татарча көрәштә батыр калучыга бүләк итеп үзенең кәҗә тәкәсен алып килгән иде! Аңа Азамат Сәвганов лаек булды. Бакчабызда бәйрәм әнә шундый күңелле мизгелләрдән генә торды, Сабантуй чәй табыны артында дәвам итте.

Нәфисә Җамалиева, тәрбияче