Азнакай йортларына авария нәтиҗәсендә сүндерелгән җылылык бирелде

Бу уңайдан район гадәттән тыш хәлләр комиссиясенең чираттан тыш утырышы үтте. Анда башкарыласы эшләр билгеләнеп, аварияне бетерү буенча план төзелде. 

– Кич буе Азнакай җылылык челтәрләре көче белән шәһәрдә җылылыкны торгызу буенча зур эш башкарылды. алты сәгать эчендә барлык эшләр төгәлләнеп, 23.30 сәгатьтә котеллар “җибәрелгән” иде инде. Температура әкренләп күтәрелә, тиздән биналар, йортлар ныклап җылынып бетәр. Үзвакытында бердәм, оператив эшләп, бу хәлдән чыгу өчен күп көч куйган АПТС, “Инженерлык челтәрләре”  оешмалары хезмәткәрләренә, җылылык челтәрләре торышын төн буе карап, саклап чыккан мәгариф идарәсе, район үзәк сырхауханәсе инженерлык хезмәте вәкилләренә рәхмәт сүзләрен җиткерәм.  Әлеге уңайсызлыклар өчен район һәм җылылык челтәрләре предприятиесе җитәкчелеге исеменнән гафу үтенәм, – диде район башкарма комитеты җитәкчесе, комиссия рәисе Айдар Шәмсетдинов. 

Бүген шәһәрдә 1 һәм 9 нчы мәктәпләрдән кала башкалары  дистанцион укыта. Шулай ук балалар бакчаларында да дежур группалар гына эшли (16, 19, 20, 21 нче балалар бакчаларыннан кала).

Кайбер фатирлардагы торбаларда җылы булмаса, аларның эчендә һава калырга мөмкин, хуҗаларның идарәче компанияләргә мөрәҗәгать итүләре сорала.