Әйдәгез, катокта бушлай шуарга!

Шәһәребезнең Ишкәев исемендәге балалар паркы стадионында бергәләп шуу өчен ел да кышын каток төзелә. Быел да аннан халыкның өзелгәне юк. Кичен биредә радиодан музыка агылып тора, олысы-кечесе берсеннән-берсе уздырып җитезлек-осталыгын сыный. Арада тимераякка әле генә басучылар да күренә. Янәшәдән скандинав йөреше белән шөгыльләнүчеләр сафы уза. Шушы мөмкинлекләрдән файдаланып, кышын чыныгып калырга теләгән, сәламәт яшәү рәвешен сайлаган райондашларыбызга карап, ничек сокланмыйсың?!