Коронавирусны булдырмый калу өчен Азнакай мәчетләрендә өстәмә чаралар күрелә

Коронавирус инфекциясе таралуга юл куймау максатында ТР Диния нәзарәтенең Голәмәләр шурасы әгъзалары тарафыннан түбәндәге өстәмә тәкъдимнәр кабул иткән:

- җомга намазына барудан тыелып торырга, укылмый калган җомга намазын өйлә намазы уку белән алыштырырга;

- җомга намазын үткәрми калу мөмкин булмаган очракларда, мәчет хезмәткәрләрен (имам, мөәзин, кизү торучы) җомга үткәрүне оештыру өчен санитар-эпидемиологик чаралар уздыруны мәҗбүр итәргә;

- җомга намазын үткәргәндә сулыш органнарын саклау чараларыннан (медицина битлекләре, тукыма битлекләре, респираторлар, мамык-марля бәйләвечләре һ.б.) файдаланучыларны һәм кул дезинфекциясен башкарган кешеләрне генә кертергә;

- мәхәлләләргә җомга намазларын туктатып торуны рөхсәт итәргә.

Әлеге тәкъдимнәр район һәм шәһәребезнең барлык мәхәлләләрендә дә үтәлә.

– Мәчеттә укулар күптән туктатылды. Районыбыз мөселманнарына намазларны өйдә укырга киңәш итәбез.  Мәчетләрдә азан әйтүче хезмәткәрләребез (имам, мөәзины) санитар-эпидемиологик чараларны даими үтиләр. Азнакайлыларны коронавирус таралуны булдырмас өчен кертелгән чараларга җаваплы карарга чакырабыз, бу чорда дини мәҗлесләрне уздыруны да (никах, исем кушу ашлары һ.б.) кичектереп торырга киңәш итәбез, – ди  районыбыз мөхтәсибе Азат Талибуллин.