Эшкә бирсәң чын күңел

Көн тудымы – кемдер кулына яңа газета алып, яңалыклар белән кызыксына, кемдер якын кешесеннән посылка яки бандероль алып куана… Хат-хәбәрләрне, күчерелгән акчаны, яздырылган вакытлы матбугат басмаларын тәгаенләнгән кешегә вакытында җиткерү – почта хезмәткәрләренең төп бурычы булып кала. Бүген элемтә бүлекләрендә аеруча “кызу” вакыт – икенче яртыеллык өчен вакытлы матбугатка яздыруның иң кызган чоры.

Шәһәрнең 1 нче элемтә бүлегеннән дә кеше өзелми.

– Кеше рухи азыксыз тора алмый. Дистәгә якын газета-журнал алдыручы гаиләләр дә бар. Азнакайлылар монда да килеп язылалар, почтальоннарыбыз өйләргә дә йөри, – ди бүлек начальнигы Раушания Хәйретдинова. – Бик бердәм һәм тату эшлибез, шуңа планнарның да үтлми калган вакыты юк.

Бүген биредә дүрт хат ташучы: Айгөл Кобычкина, Гөлназ Ситдикова, Лариса Усманова, ике оператор: Зөлфия Мөхәммәтҗанова һәм Ләйсән Кашапова тырыш хезмәт куя.

Аларның һәрберсе – үз эшенең чын остасы.

–Үз эшеңне яратмасаң, кешеләргә хөрмәт белән карарга өйрәнмәсәң, беркайда да эшләп булмый, – ди алар.