Азнакайда берәүнең 11 баш сарыгын урлаганнар

Узган атнада районда ике җинаять кылынган, бу хакта Россия Эчке эшләр министрлыгының Азнакай районы буенча бүлеге начальнигы Илдар Шакиров белдерде. Кеше милкен урлап "баерга" теләүчеләр дә әзәйми. Күктәкә авылыннан берәүләр 11 баш сарык урлаган. Бүген авылларда көтү тиешле дәрәҗәдә оештырылса да, кайберәүләр малларын урамга чыгарып җибәрүне хуп күрә. Әнә шулай урам, юл буенда йөргән маллар караклар өчен менә дигән "азык"ка әверелә дә куя. Бу хакта дүшәмбе киңәшмәсендә район башлыгы урынбасары Наҗәт Нәгыймов та билгеләп үтте һәм малларын үз иркендә йөрткән хуҗаларны закон нигезендә административ җаваплылыкка тартырга кушты.