Азнакайның Мәнәвез Мәдәният йорты күрше авылларны күңелле кичәгә чакырды - ФОТО

Күрше авыллардагылар белән дуслыкта, аралашып яшәвебезнең янә бер мисалы булды күңелле кичәбез. Туйкә, Әгерҗе, Үчәлле, Сәпәй авылларының яшен-картын үзебезгә кунакка дәштек.

Әнә шулай ул көнне Мәнәвездәге мәдәният йорты шау-гөр килеп торды. Сәхнә осталарының һәр чыгышы тамашачы тарафыннан алкышларга күмелде. Җырлар, төрле милләтләр биюләрен кызыклы тамаша, уен-бәйгеләр алыштыра торды.

- Менә шулай төрле милләт һәм төрле буын вәкилләре дус, тату булып, аралашып, күңелле яшик! - диде бәйрәм белән котлап Әгерҗе авыл биләмәсе башлыгы Назиф Хәсәнов.

Чакыруыбызны шунда ук кабул итеп, бергәләп ял итәргә авылыбызга җыелган кунакларны изге теләкләр юллап озаттык.

Гөлназ Исламова