Азнакайлылар электрон акча янчыкларына күчә

Ни хикмәт, электрон түләүләргә әле бик ияләшеп китә алмыйбыз. Ай ахыры җиткәндә саклык банкларында, почтамтта, фатир, коммуналь хезмәтләр өчен түләү алынган башка шундый учреждениеләрдә чиратлар булу әнә шул хакта сөйли. Ә бит югыйсә "электрон янчык" бик уңайлы нәрсә. Иртәме-соңмы, барыбыз да аннан файдалана башлаячак. Электроника ярдәмендә үзегез һәм гаиләгез өчен кәрәзле элемтә, Интернет, коммуналь хезмәтләр өчен түләүләрне башкарырга, табибка, ЗАГС бүлегенә кабул ителергә, балалар бакчасына чиратка язылырга, юл хәрәкәте кагыйдәләрен бозган өчен штраф түләргә һәм башка күп кенә гамәлләр башкарырга мөмкин. Электрон акчаларның көче шунда: алар мизгел эчендә тиешле гамәлләрне теләсә кайсы вакытта һәм урында, минималь комиссия бәрабәренә башкарырга ярдәм итәләр.