Азнакай районы бердәм диспетчер хезмәте көнгә 25 хәбәр кабул итә

Бүген биредә дүрт диспетчер тәүлек саен алышынып эшли.

–Шалтыратулар Казанда урнашкан үзәктә кабул ителә, аннан безгә юллана. Азнакайлылар. Билгеле мәсьәлә буенча диспетчер ярдәмгә нинди хезмәтне җибәрү турында карар кабул итә, – ди Айсылу Зарипова.

Моңа кадәр бердәм диспетчер хезмәте янгын сүндерү частенда урнашкан булса, бүген алар аерым бинага урнашканнар. Эш барышы белән район башлыгы Марсель Шәйдуллин да танышты.

– Сезнең хезмәт бик кирәкле. Җирлегебездә гадәттән тыш хәлләр әзрәк булсын, кешеләр каза күрмәсен, – диде җитәкче үзара сөйләшү барышында.

Айгөл Шәймәрданова – биредә ике елга якын диспетчер булып эшләү дәверендә күптән аның асылына төшенергә өлгергән.

– Эшем җаваплы булса да, бик ошый. Авыр чакта кешегә ярдәм итү алу – үзе үк бәхет. Төрле проблемалар белән шалтыратучылар да була, аларга ничек тә ярдәм итү юлларын эзлибез, кайда мөрәҗәгать итәргә кирәклеге турында әйтәбез. Кайвакыт балалар да “Су ага, ярдәм кирәк”, – дип шалтыраталар. Берсен дә игътибарсыз калдырмыйбыз, балаларны тынычландырып, барысын да аңлатырга, ярдәм итәргә тырышабыз, – ди Айгөл.