18-21 февральдә Азнакайда XII Бөтенроссия билбаулы көрәш ярышлары үтәчәк

Азнакай элек-электән үзенең мәйдан батырлары белән дан тоткан төбәк. Әлеге спорт төрен тагын да үстерү максатында җирлегебездә әледән-әле зур чаралар уздырылып тора. Әнә шундый зур бәйгенең чираттагысы 18-21 февральдә "Чатыр-Тау Арена" спорт комплексында уздырыла. Бу көннәрдә Азнакайга Татарстанда гына түгел, Россия күләмендә дә чын легендага әйләнгән билбаулы көрәш осталары, РФнең Атказанган тренерлары Мәгас Сәхабетдинов һәм Әсхәт Шәйхетдинов истәлегенә узган XII Бөтенроссия ярышларына илебезнең төрле почмакларыннан билгеле көрәшчеләр җыелачак. Бәйгене тантаналы ачу 19 февраль көнне 13.00 сәгатьтә башлана.