Азнакай мәчетләрендә балалар өчен лагерьлар эшли

Зәңгәр мәчеттә оештырылган өч атналык лагерьга 43 бала йөри.

– Балаларга укытучыларыбыз ислам дине нигезләрен бирә. Моннан кала, алар беренче ярдәм күрсәтү серләренә дә төшенә, кул эшләре белән дә шөгыльләнә, хезмәт дәресләре дә керә. Балалар үз куллары белән сыерчык оялары ясадылар, аларны мәчет территориясендәге агачларга элдек. Туклану да оештырылган, пешекчеләребез азыкны төрләндереп, бик тәмле аш-сулар әзерлиләр, – ди Зәңгәр мәчет имам-хатыйбы Нәфис хәзрәт Хәкимов.

Узган атнаның җомгасында балалар шагыйрә Илмира Сәлахова белән очраштылар. Лагерьга йөрүчеләр аның шигырьләрен сәнгатьле итеп укыдылар.

– Мәчеттә телебезне саклауга, аны үстерүгә зур игътибар бирелә икән, шуңа бик шатланып кайттым.  Биредә бүген, чыннан да, сокланырлык тормыш гөрли. Уку барышында бик күп яңалыкларга өйрәнгәннәр, кул эшләренең күргәзмәсе һәм кече Сабантуй да оештырылачак икән, – ди Илмира Сәлахова.

– Телебезне саклау – һәркемгә бәйле. Шуңа мондый очрашуларны даими оештырырга тырышабыз, – ди Нәфис хәзрәт тә.