90 яшьлек Динә апа кроссворд, сканвордлар чишә - ФОТО һәм ВИДЕО

Оренбург өлкәсендә туып, сугыш елларында мәктәптә укыганда шунда колхоз эшләрендә йөреп үскән, яшьлек елларын Урта Азиядә үткәргән Динә Баһау кызын язмыш дигәнең Азнакай егете Шәфикъ белән очраштырып, безнең якларга алып килгән.

Гомер дигәнең ай-һай тиз үтә шул – Динә апа да бу көннәрдә 90 яшен билгеләп үтте. Аны район башлыгы урынбасары Наҗәт Нәгыймов, үзе эшләп чыккан “Азнакайнефть”нең ветераннар советы рәисе Мисбах Мәсәлимов, социаль яклау идарәсе җитәкчесе Элиза Мәрданшина барлык азнакайлылар исеменнән тәбрикләп, бүләкләр тапшырдылар.

Шушы яшендә дә Динә апа тулы канлы тормыш белән яши, “Маяк” газетасын яратып укуын, андагы кроссворд, сканвордларның берсен калдырмый чишеп баруын да әйтте ул безгә.