Африка чумасы профилактикасы буенча Азнакайда ике айлык бара

2016 елның 1 маена Россия Федерациясе территориясендә чучкаларның Африка чумасы белән авыруының 15 очрагы теркәлгән. Әлеге чирнең Татарстан территориясенә якын өлкәләрдә - Пензада һәм Саратовта ачыклануы зур борчу тудыра. Әлеге куркыныч чирне булдырмау максатларында республикабызда, шул исәптән районыбызда 1 июньнән 1 августка кадәр профилактик ике айлык үткәрелә. Аның барышында тере чучкаларны, итен һәм итеннән ясалган продукцияләрне, чималны, чучкалар өчен азыкны рөхсәтсез республика территориясенә кертү, төрле базарларда, урамда хокуксыз сату җитди күзәтүгә алыначак. Йорт чучкалары үлгәндә, урманнарда кыргый кабаннар үләксәсенә тап булганда, Азнакай дәүләт ветеринария хезмәтенә хәбәр итә аласыз.