Ут- ул һөнәр яки хоббимы?

Баскыч буйлап үрмәләү дисеңме, противогаз куллану, куе төтен эчендә хәрәкәт итү, йөгерү, сикерү, авырлык күтәрү дисеңме! Шуның өстенә кемнедер коткарыр өчен һәрвакыт үз тормышыңны куркыныч астына куярга әзер булырга кирәк тагын. Әлеге санап киткән сыйфатлар бу һөнәрләрнең үзенчәлекләрен хасил итә.

Чын янгын сүндерүче ару-талуның нәрсә икәнен дә, "булдыра алмыйм" сүзләрен дә белми. Тәүлекнең теләсә кайсы вакытында, теләсә нинди һава торышында, эсседә һәм көчле салкында, теләсә нинди халәттә һәм кәефтә ул утка һәм суга барырга әзер. 24 янгын сүндерү-коткару часте эшчеләре югарыда күрсәтелгән сәләтләргә генә түгел, башка бик күп талантларга да ия. Шундыйлардан 24 ПСЧ ның яшь янгынчысы Ильяс Зәйнуллин, янгын белән генә көрәшеп калмый, хәтта кухнядагы утны да үзенә буйсындыра.

Ул Азнакайда узган «Тәмле дөнья» кулинария конкурсына катнашып, диплом яулады һәм бүгенге көндә үзенең гаиләсен һәм хезмәттәшләрен тәмле ризыклар белән сөендерүне дәвам итә. 

24 нче ПСЧ коллективы Ильясны конкурста җиңүе белән котлый һәм алга таба аның гадәти булмаган мавыгуында уңышлар, эштә яңа үрләр яулавын тели.

24 янгын сүндерү-коткару часте матбугат хезмәте