Азнакайда сәяси репрессия корбаннарын искә алу кичәсе узды

Сәяси репрессия корбаннарын искә алу көне уңаеннан шәһәребезнең "Акчарлак" ресторанында кичә үтте. Анда "халык дошманы" тамгасы алып, гөнаһсызга җәберләнгәннәрнең балалары - барлыгы 80 кеше җыйналды.

Муниципаль район башлыгы Марсель Шәйдуллин Россия тарихында җан өшетерлек вакыйга булып уелып калган репрессия елларының бүген дә күпләрнең күңелендә саклануын билгеләп үтте.

- Сау-сәламәт булыгыз, әти-әниләрегез рухына догалар кылып яшәгез. Үз чиратыбызда без сезгә ярдәм итәргә тырышырбыз, - диде ул кичәнең мөхтәрәм кунакларына.

Мул табын артында авыр, фаҗигале балачак истәлекләре яңарды. Өлкәннәр тарихи дөреслекнең торгызылып, әти-әниләренең якты исемнәре кире кайтарылуына сөенечләрен, бүгенге матур тормышка куанып яшәүләрен белдерделәр, күрсәтелгән кадер-хөрмәт өчен җитәкчеләргә тирән рәхмәтләрен җиткерделәр.

- Кулак дип яла ягып, бар мөлкәтебезне тартып алганнар. Миңа ул чакта - 1 яшь, олы апама 6 яшь булган. Әтине алып киткәч, әни теләсә-кемнең мунчасында, абзарында кунып йөрергә мәҗбүр булган. Апам, шунда салкын тидереп, якты дөньядан киткән. Әтиебез 1937 елда акланып кайтты, - ди Даимә апа Латыйпова. Ул үзе гомере буе укытучы булып эшләгән.

Кәкре Елгадан Кәбир ага Вәливнең дә күңел түрендәгесе ташыды.

- Гел "бишле"гә генә укый идем. Әтигә гаеп ягылгач, фотосурәтемне мәктәпнең Мактау тактасыннан алдылар, бик күңелем төште. Йорт-җирсез, мал-туарсыз урамда басып калдык. Гомерем буе "халык дошманы малае" түгеллегемне расларга тырышып яшәдем. Авылымны күтәрү өчен зур көч куйдым, - ди ул.

Кәбир ага бүген - "Авылның мактаулы гражданины", Кәкре Елганың бер урамына аның исемен кушканнар.
Самат ага Мирсәетов исә әтисе күргәннәрне "Бишенче колонна" дигән китабында тасвирлаган.

Кичә әнә шулай чыгышлар, җыр-моң белән үрелеп барды. Соңыннан һәр кунакка бүләк тапшырылды.
Бу көнне "Яшь Гвардия"челәр Сәяси репрессия корбаннары истәлегенә салынган һәйкәлгә чәчәкләр куйды.

Резеда ШӘРИПОВА