Азнакайда Халыкара өлкәннәр көне һәм Укытучылар көненә багышланган зур бәйрәм ярминкәсе узды

Ә бу юлы монда алма төшәр урын да юк иде. Халыкара өлкәннәр көне һәм Укытучылар көненә багышланган бәйрәм ярминкәсе шәһәр халкын аеруча күп җыйды. 

Сәүдә рәтләрендә ниләр генә юк: итнең төрлесе, сөт продуктлары, бал-май, җиләк-җимеш, яшелчәләрнең әллә ничә төре... Үсентеләр, кул эшләнмәләре, бәйләм әйберләре дә үз хуҗаларын көтә. Ә сатучылар янында - су буе чират. 

Бу көнне ярминкәдә мәгариф учреждениеләре коллективлары да актив катнашты. Алар төрле продукция тәкъдим итеп, бәйрәмгә үз өлешләрен кертте. 

Мәйданда сәүдә белән генә түгел, җыр-моң белән дә күңел ачтылар. Үзешчәннәрнең чыгышлары ярминкәгә бәйрәм төсмере өстәде. 

Концерт карап, продукция туплап кайтып барам. Оештыручыларга рәхмәт,

–  ди Гөлнәзирә апа Сафина. 

Райондашларга шәһәр башкарма комитеты җитәкчесе Эльвир Габдрахманов та үзенең изге теләкләрен җиткерде.