Россиянең телевидение һәм радиотапшырулар челтәренә — 25 ел!

2001 елда Россия Президенты Указы белән оештырылган предприятие 79 радиотелеүзәкне бердәм җитештерү-технологик комплекс итеп берләштерә һәм элемтә өлкәсендә табигый монополия булып тора.

РТРЧ — региональ теле- һәм радиотапшыручылар өчен төп элемтә операторы. Аның эшчәнлеге гражданнарның мәгълүмат алуга конституцион хокукларын гамәлгә ашыруда мөһим роль уйный, шулай ук дәүләтнең оборона куәте, куркынычсызлыгы һәм технологик мөстәкыйльлеге өчен стратегик әһәмияткә ия.

2010 елларда РТРЧ «Россия Федерациясендә телерадиотапшыруларны үстерү» федераль максатчан программасы буенча эшләп, дөньядагы иң зур цифрлы эфир телечелтәреннән берсен барлыкка китерде. Бу челтәр 140 меңнән артык торак пунктта яшәүчеләрнең 98,6 процентына абонент түләвеннән башка 20 телеканал һәм өч радиостанцияне бушлай тәэмин итә.

Предприятие яңа хезмәтләр һәм сервислар кертә: аның инфраструктурасы интернет һәм мобиль элемтә, гадәттән тыш хәлләр турында төбәк һәм муниципаль хәбәр итү өчен дә кулланыла. Останкино 540 метрлы манарасы — предприятие флагманы, ул Россиядә һәм Европада иң югары корылмаларның берсе булып кала.

Предприятиедә төзелгән күмәк килешү элемтә тармагында берничә тапкыр иң яхшысы дип танылды. Хезмәткәрләр өчен Россия Федерациясе Хезмәт кодексында каралмаган 30дан артык социаль ташлама кертелгән.

2009 елның маеннан Татарстан Республикасы радиотелетапшырулар үзәге (РТТҮ) филиал буларак РТРЧ структурасына керә. Татарстан филиалы республика халкының 99,3 процентына сыйфатлы күпканаллы телерадиотапшырулар тәэмин итә. Цифрлы телечелтәр федераль программаларны гына түгел, ә «Татарстан» ДТРК» төбәк блокларын «Россия 1», «Россия 24» телеканалларында һәм «Радио России» радиоканалында, шулай ук «Татарстан‑Яңа Гасыр» (ТНВ‑Татарстан) региональ телеканалын ОТР телеканалында трансляцияләүче 87 тапшыру станциясен үз эченә ала.

Республика халкының 83,3 проценты «Радио России + Радио Татарстана» радиопрограммалары, 62,2 проценты — «Маяк» радиосы һәм тагын 62,2 проценты «Вести FM» радиопрограммалары белән тәэмин ителә.

2000 елдан предприятие «Яңа Гасыр» ТРК» АҖ программалары өчен аналог телерадиотапшырулар челтәрен булдырды һәм аның эшләвен тәэмин итте. 2012 елның 1 мартында Казанда Россиядә беренче булып DVB‑Т2 стандартында 1 нче цифрлы программалар пакеты, ә 2013 елның 26 июнендә тагын беренче булып эфир телевидениесенең 2 нче цифрлы пакеты трансляцияләнде.

РТРЧ технологик комплексы импортны алыштыру юлында даими рәвештә яңартыла. «Татарстан Республикасы радиотелетапшырулар үзәге» РТРЧ филиалы 2024–2025 елларда Татарстан территориясендә эфир телетапшыргычларын цифрлыга алмаштыру программасын үтәде: 1 нче мультиплекста барлык 87 тапшыргыч алмаштырылды.

2024 елда Радиотелетапшырулар үзәге манарасына медиафасадлы яңа яктырткыч урнаштырылды — хәзер бу манараны республика башкаласының визит карточкасы дип саныйлар.

«Россия телевидение һәм радиотапшырулар челтәренең 25 еллыгы — безнең илнең бердәм мәгълүмат киңлеген адымлап булдыру тарихы. Татарстандагы филиал зур системаның бер звеносы гына түгел: без көн саен сигналның һәр йортка, хәтта иң ерак авылларга да барып җитүе өчен җаваплы торабыз. Командабызның бу зур һәм мөһим эшкә өлеше кертүе белән горурланам», — ди Татарстан филиалы директоры Якимов Владимир Николаевич.

Филиал объектларында радиотехник җиһазлар урнаштырылган: алар аша 10 Россия һәм төбәк радиокомпаниясе программасы, шулай ук кәрәзле элемтә операторларының 140 база станциясе трансляцияләнә.

«Татарстан Республикасы РТТҮ» филиалы базасында телерадиотапшырулар музее оештырылды: анда ел саен мәктәп укучылары, студентлар һәм республика гражданнары була.

Предприятие берничә тапкыр РТРЧның иң яхшы филиалы дип танылды. Россия Федерациясе Президенты В. В. Путин үзенең котлавында РТРЧнең сыйфатлы һәм өзлексез телерадиотапшырулар белән тәэмин итүдәге ролен билгеләп үтте.

Юбилей алдыннан Татарстан Республикасы филиалы коллективы күпьеллык нәтиҗәле хезмәте һәм республикада телерадиотапшыру чараларын үстерү һәм камилләштерүгә керткән өлеше өчен Татарстан Республикасы Рәисе Р. Н. Миңнехановның Рәхмәт хатына лаек булды.