Эш урынын – спортзалга

Көньяк-көнчыгыш конференциясендә Сарман, Зәй, Әлмәт, Бөгелмә, Азнакай, Ютазы районнарында хезмәт куючылар очрашты. Аларны район башлыгы Марсель Шәйдуллин сәламләп, җирлегебездә спортны үстерү өчен барлык мөмкинлекләр дә барлыгын ассызыклап үтте.

– Социаль фонд хезмәткәрләре спартакиадасының зональ турын Азнакайда уздыру безнең өчен зур горурлык. Ярышлар матур узсын, анда сезгә хас гаделлек сыйфатлары чагылыш табар дип ышанам, – диде җитәкче үзенең
чыгышында.

Спартакиадада Россия Социаль фондының ТР буенча идарәсе җитәкчесе урынбасары Фердинанд Закиров та катнашты. Ул хезмәттәшләренә, әлеге ярышларны уздыруда зур көч куйган район җитәкчелегенә, хөкемдарлар
коллегиясенә рәхмәтен җиткерде. Бу көнне хезмәткәрләр спортның алты төре: кул көрәше, бадминтон, йөзү, өстәл теннисы, волейбол һәм футболда беренчелек өчен көрәште.

– Коллективыбыз дус, бердәм. Барысы да спорт белән дус. Эш-мәшәкатьләребез тыгыз булса да, районда уздырылган спорт ярышларында катнашырга вакыт табабыз, тренировкаларга да даими йөрибез. Үз үрнәгебездә балаларга, яшьләргә сәламәт яшәү рәвешен пропагандалыйбыз, – ди идарәнең клиентлар белән эшләү хезмәте җитәкчесе Миләүшә Шәйдуллина.