Азнакай районы терлекчесе Гөлчирә Фатыйхова маллар телен дә аңлый

Ул һәр терлекнең холкын аңлап, үз эшенә зур җаваплылык белән карый.

Аның хезмәт кенәгәсенә күз салсаң, авыл хуҗалыгының бер тарихы ачылгандай була. Бозау караучы да булган ул, тудыру бүлегендә дә эшләгән, лаборант һәм учетчик вазифаларын да башкарган. Ә инде соңгы унбиш елга якын ул – хуҗалыкның тәҗрибәле ясалма орлыкландыру технологы.

Аның тормыш иптәше Исмәгыйль дә шушы ук хуҗалыкта хезмәт куя.

Терлекчелектә гади кеше күзенә күренмәгән хезмәт тә күп. Шуңа күрә монда төгәллек һәм җаваплылык аеруча мөһим. Әмма болар белән беррәттән терлекләрне ярату, аларны аңлый белү дә кирәк.

Алар да кешеләр кебек. Кайсы тыныч, кайсы кире, кайсы иркә. Һәркайсына үзенә күрә якын килергә кирәк,

– ди тәҗрибәле белгеч.

Районда үткәрелгән сыер савучылар һәм технологлар бәйгеләрендә дә Гөлчирә апаның исеме еш яңгырый.

Авыл хуҗалыгында еллар буе намус белән хезмәт итү өчен белем генә җитми. Моның өчен күңел җылысы, сабырлык һәм үз эшеңә тугрылык кирәк.

Гөлчирә Фатыйховада исә бу сыйфатларның барысы да бар. Шуңа күрә ул бүген дә иртә таңнан фермага– үзенең яраткан эшенә, үзенең яраткан дөньясына ашыга