Азнакайның иң яхшы чыгарылыш укучыларына медальләр тапшырылды

Быел мәктәпне 269 укучы тәмамлый. Аларның 47 се “Укудагы аеруча уңышлары өчен” медаленә лаек. Иң күп медаль ияләре Азнакай 2 нче урта мәктәбендә – 8 укучы. Шулай ук 7 нче мәктәптә, гимназиядә – 5 әр, 4 нче лицейда, Актүбә 1 нче урта мәктәбендә – 4 әр медалист. Авыл мәктәпләре укучылары да белем ягыннан калышмыйлар: Тымытык, Чаплы, Чубар Абдул, Җиңү мәктәпләрендә дә 1 әр медалист бар.

Тантаналы чарада район башлыгы Марсель Шәйдуллин һәм “Татнефть” җәмгыяте генераль директоры урынбасары Азат Ягафаров катнашты.

– Бу сезнең, әти-әниләрнең, укытучыларның уртак хезмәт җимеше, тырышлыгы нәтиҗәсе. Сез районыбыз горурлыгы. Киләчәктә төрле өлкәләрдә эшләп, районыбыз үсешенә үзегездән лаеклы өлеш кертерсез дип ышанабыз, – диде Марсель Шәйдуллин.

Азат Ягафаров та чыгарылыш укучыларына тормышта үз юлларын табуларын, уңышлар теләде.

– “Татнефть” җәмгыяте мәгариф өлкәсенә һәрчак ярдәм күрсәтә. Нефтьче һөнәрен сайларга теләүчеләрне Әлмәткә чакырам. Компания биредә дөньякүләм дәрәҗәдәге югары класслы мәгариф үзәге ачарга планлаштыра. Сез эшли дә, һөнәр дә үзләштерә аласыз, – диде ул.