Азнакайда беренче сыйныфка баручы 150 балага яңа портфельләр тапшырылды

“Бердәм Россия” партиясенең “Мәктәпкә җыенырга ярдәм ит” акциясе кысаларында 17 августта шәһәребезнең Татарстан мәйданында социаль яклауга мохтаҗ һәм  махсус хәрби операциядә катнашучылар гаиләләрендәге 150 гә якын беренче сыйныфка баручы балага уку кирәк-яраклары тутырылган портфельләр тапшырылды.

Аларны муниципаль район башлыгы Марсель Шәйдуллин һәм Татарстан Республикасы Дәүләт Советы депутаты Рөстәм Мөхәммәдиев тәбрикләде һәм тырышып укуларын теләде.

– Бик зур рәхмәт үзебезнең җитәкчеләребезгә, нефтьчеләребезгә, депутатларыбызга. Аларның ярдәме белән без бүген балаларга шушы портфельләрне тапшырабыз. Бер-беребезгә һәрчак шулай игътибарлы булып, игелек кылып яшәсәк иде. Безнең өчен һәр бала якын, кадерле һәм 1 сентябрь аларның барысы өчен зур бәйрәм булырга тиеш,   – диде Марсель Шәйдуллин.

Мәктәп бусагасына тәүге тапкыр аяк басу – ул бик дулкынландыргыч һәм истәлекле вакыйга. Шуңа күрә портфельләр алуга да балалар, 1 сентябрьгә кебек, бөтен шартын китереп киенеп килгәннәр. Һәрберсенең тизрәк портфельнең эчен ачып карыйсы, анда ниләр барлыгы белән танышасы килә.

– Төпчегебез – өченче балабызны беренче сыйныфка озатабыз. Мәктәп кирәк-яраклары сатып алу әти-әниләргә ярыйсы гына кыйммәткә төшә. Безнең кебек күп балалы гаиләләр өчен бу бик зур ярдәм, рәхмәт җитәкчеләргә, – ди Лиана Мөкъминова.

Быел районда парта артына беренче тапкыр 711 бала утырачак.