Азнакай

Азнакай районы

18+
Рус Тат
МӘГАРИФ. «Һөнәр иясе»

Ватанга хезмәт итү – изге бурыч!

Азнакай районы мәктәпләрендә депутатлар һәм район җитәкчелеге катнашында парламент дәресләре уза.

Шәһәребез гимназиясендә узган чарада ТР Дәүләт Советы депутаты Нәҗип Хаҗипов, Азнакай районы башлыгы урынбасары Роза Галиева, Азнакай шәһәр Советы депутаты Азат Вәлиев, мәгариф идарәсе җитәкчесе Зөлфия Гыйләҗева катнашты.

Быелгы дәресләр Татарстан Республикасында, Россия Федерациясендә Ватанны саклаучылар елына, Бөек Ватан сугышында Җиңүнең 80 еллыгына багышлана. 

Парламент дәресе гимназиянең 9нчы сыйныф укучылары  өчен үткәрелеп, аның максаты: укучыларда гражданлык патриотизм хисләре тәрбияләү, укучыларның илнең дәүләт төзелеше турында белемнәрен тирәнәйтү, аларның иҗади активлыгын үстерү булды.

Дәресне тирәнтен эш тәҗрибәсе булган тарих һәм җәмгыять белеме укытучысы Гөлнур Шәйдуллина кызыклы, эчтәлекле итеп алып барды. Шунысын да искәртеп үтәргә кирәк, дәрес саф татар телендә узды. Катнашучыларга Ватанны саклаучылар  турында мәгьлүмати фильм күрсәтелде, интеллектуаль уеннарда укучылар да, кунаклар да актив катнашып, сорауларга җавап биреп, тарих турында белемәрен тикшерделәр.

ТР Дәүләт Советы депутаты Нәҗип Хаҗипов укучыларга илебезнең лаеклы гражданнары булу өчен тырышып укырга, һөнәр үзләштерергә кирәклеген ассызыклады. Алда уңышлар теләде. Муниципаль район башлыгы урынбасары Роза Галиева, үз чыгышында:

«Безнең Азнакай районы бик күп батырлар үстерде.  Ватаныбыз азатлыгы өчен көрәшеп башларын салган райондашларыбызга, бүгенге көн геройларына без рәхмәтлебез» – диде.

Гимназия кунаклары мәктәп стеналарында алып барылган проектлар һәм музей эшчәнлеге белән дә таныша алдылар. Мондый очрашулар мәктәп укучыларында Ватанга тугрылык, кыюлык  хисләре уята.

Следите за самым важным и интересным в Telegram-каналеТатмедиа

Подпишитесь на Telegram- канал газеты «Маяк», а так же читайте нас в «Дзен» и всегда оставайтесь в курсе новостей района!


Галерея

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев