22 ИЮНЬ – ХӘТЕР ҺӘМ КАЙГЫ КӨНЕ

22 июньдә, Россиядә Хәтер һәм кайгы көне билгеләп үтеләчәк. 22 июнь илебез өчен иң кайгылы, ачы күз яшьле, фаҗигале көн. Бу көн сугышка китеп, туган ягына әйләнеп кайта алмаганнарны искә алу, Бөек Җиңү һәм шушы Җиңүне яулап алган какшамас фронт һәм тыл каһарманнарын күңелләребездә яңарту көне. Аларның батырлыгы – безнең бүгенге тыныч тормышыбызның нигезе. “Беркем дә, бер нәрсә дә онытылмады” сүзләре үзенең әһәмиятен бүген дә югалтмый.

Бу көн безгә сугышның авыр елларын, милләтләребез кичергән сынауларны истә тотарга, ирек һәм тынычлык бәясе турында искәртә. Бөек Ватан сугышының дәһшәтле елларында фронтка киткән якташларыбызның батырлыгы, туган илгә мәхәббәте безнең өчен мәңге үрнәк булып калачак. Һәр гаиләнең үз сугыш тарихы бар, үз кайгысы. Без бу хәсрәтне бергә кичердек, бергә истә тотабыз.

Сугыш чоры авырлыкларын кичергән ветераннарга, тыл хезмәтчәннәренә һәм балаларына аерым рәхмәт сүзләре әйтәбез. Сезнең хезмәтегез, сабырлыгыгыз, батырлыгыгыз – киләчәк буыннарга үрнәк. Без бу авыр сынауларны истә тотарга, тарихыбызны белергә, аны киләчәк буыннарга тапшырырга бурычлы. Тынычлык һәм иминлек өчен көрәшүчеләр хәтере мәңге безнең йөрәкләребездә яши.

Барыгызга да тынычлык, иминлек, изгелек телим!

Марсель Шәйдуллин, Азнакай районы башлыгы