Урман янгыннарын ничек кисәтергә: Азнакай белгечләре мөһим кагыйдәләрне искә төшерә

Белгечләр билгеләп үткәнчә, югары температура һәм коры һава торышы янгын таралу өчен уңай шартлар тудыра. Әмма урман янгыннарының төп сәбәбе күп очракта кеше гамәлләре белән бәйле.

Эссе вакытта урмандагы үлән, коелган яфраклар һәм мүк тиз кибә. Шуңа күрә хәтта кечкенә генә очкын да зур янгынга сәбәпче булырга мөмкин. Ә җилле көннәрдә ялкын бик тиз тарала һәм зур мәйданнарны колачлый.

Урманда янгын чыгуга еш кына түбәндәге гамәлләр китерә:

- күзәтүсез калдырылган яки тулысынча сүндерелмәгән учаклар;

-сүндерелмәгән тәмәке төпчекләре һәм шырпылар;

-коры үләнгә яки чүп-чарга ут төртү;

-балаларның ут белән шаяруы.

Моннан тыш, урманда калдырылган пыяла шешәләр һәм аларның ватыклары да кояш нурларын туплап, үләнгә ут кабуга сәбәп булырга мөмкин.

Урманда янгын чыкмасын өчен нәрсә эшләргә?

Фаҗигале хәлләргә юл куймас өчен, белгечләр берничә мөһим кагыйдәне үтәргә киңәш итә:

-учакны махсус рөхсәт ителгән урыннарда гына ягарга;

-китәр алдыннан учакны тулысынча сүндерергә;

-урманда янып торган әйберләр ташламаска;

-коры үлән һәм чүп-чар яндырмаска;

-балаларны күзәтүсез калдырмаска һәм аларга ут белән уйнауның куркынычын аңлатырга.

Әгәр урманда янгын чыгуын күрсәгез, кичекмәстән җаваплы хезмәтләргә хәбәр итәргә кирәк. Моның өчен 8 (85592) 7-85-17 яки 8 (85592) 7-76-86 телефон номерларына шалтыратып, янгын урынын төгәл күрсәтергә сорала.