Иң яхшы хат ташучылар бүләкләнде

Очрашуда район Советы аппараты җитәкчесе Айдар Хәлиуллин, «Маяк» газетасы баш мөхәррире Фәрхәт Шәйхулов, Әлмәт почтамтының Азнакай бүлеге җитәкчесе Марина Шәрипова, шәһәр һәм авыл почта элемтәсе бүлекләре хат ташучылары катнаштылар. Анда почта өлкәсендә башкарылган эшләр, алда торган максатлар һәм әлбәттә, район газетасына язылуның барышы, укучыларны борчыган проблемалар турында эшлекле сөйләшү булды. Җитәкчеләр фидакарь, авыр хезмәтләре өчен почтальоннарга олы рәхмәтләрен белдерделәр. Алга таба да бергә, бердәм булып хезмәттәшлек итәргә чакырдылар. Соңыннан «Маяк» газетасына язылуны оештыруда актив катнашкан алдынгыларны бүләкләделәр. Шәһәр бүлекчәләрендә эшләүче почтальоннар арасында бу юлысы да Айгөл Кобычкина лидер булды. Авыл бүлекчәләре арасында Балтач бүлекчәсе хат ташучысы Дания Якупова беренче урынга чыкты. Җиңүчеләрнең икесенә дә «Маяк» газетасының күчмә кубогы тапшырылды. Бүләкләргә шулай ук подписка эшендә активлык күрсәткән башка хат ташучылар да ия булды.

Тулырак «Маяк» газетасыннан укырсыз.