Олыны – олы, кечене кече итеп

М.Шәйдуллин кечкенәләргә бүләк тапшыра

Район башкарма комитеты җитәкчесе вазифаларын башкаручы Марсель Шәйдуллин Яңа ел бусагага аяк басар алдыннан район ветераннар советы вәкилләрен һәм кечкенә азнакайлыларны - 14 нче балалар бакчасында тәрбияләнүчеләрне бәйрәм белән котлады.

-Бүгенге матур тормышыбызга тырыш хезмәтегез белән сез нигез салдыгыз. Барчагызга сәламәтлек, иминлек телим. Алга таба да бергәләп уңышларга ирешербез дип ышанам, - дип Марсель Зөфәр улы өлкән буынга рәхмәтен белдерде.

Балалар бакчасында исә аны нәниләрнең шат авазы каршы алды.

-Сез - безнең дәвамчылар. Акыллы, тәүфыйклы булыгыз, беркайчан да авырмагыз, әти-әниләрегезнең, тәрбиячеләрегезнең өметләрен аклагыз, - диде ул бәйрәмчә киенгән малайлар һәм кызларга.