Сырганак “бәхет гормоны”на бай

Ул кытай һәм тибет медицинасында киң кулланылган. Фармакологиягә рәсми рәвештә исә аны бары 1970 елларда гына кертә башлыйлар.

Хәзер сырганак дөньяның төрле илләрендә үсә, хәтта салкын Себер якларында да таралган.

Ул витаминнарга һәм микроэлементларга бай. Андагы С витамины термик эшкәрткәннән һәм катырганнан соң да саклана.

Сырганак ялкынсынулар һәм яраларны дәвалый. Аның маен көнгә берничә чәй калагы куллану Е витаминына булган тәүлеклек ихтияҗны канәгатьләндерә. Составындагы төрле кислоталар ашкайнатуны яхшырта.

Сырганак җимешендә һәм кайрысында  “бәхет горомоны” – серотонин бар. Ул шоколад, банандагыга караганда берничә тапкырга күбрәк.

Әмма һәр җимешнең файдалы ягы белән зарары барын да онытырга ярамый.

Эч йомшарту үзлегенә ия булганлыктан, сырганакны сак куллану киңәш ителә. Ашказаны һәм эчәк җәрәхәтләре, гастрит, бөерләрдә, үт кугында таш, аллергия булганда да кулланмау хәерле.