“Мин татарча сөйләшәм” акциясенә Актүбә укучылары да кушылды

Актүбә 2 нче урта мәктәбе дә республикада узучы "Мин татарча сөйләшәм" акциясенә кушылды. Укучылар концерт программасы белән классларга, балалар бакчаларына, башка мәктәпләргә чыгып, җырлары, биюләре, шигырьләре белән телебезгә карата игътибарлы һәм ихтирамлы булырга кирәклеген искәрттеләр. Бу чарада тамашачылар да актив катнашты. Алар интеллектуаль бәйгедә татар теленең грамматикасы, бистәбез тарихы, Татарстан символикасы буенча белемнәрен сынаштылар. Бәйгедә иң күп балл җыеп, Гөлчәчәк Шагалиева 1 нче урынга чыкты. Айдар Мифтахов һәм Булат Шәкертҗанов та татар телен яхшы белүләрен исбатладылар.

Гөлгенә Мусина,

татар теле һәм әдәбияты укытучысы