Кайсын сайларга?

Бүгенге көндә нинди һөнәрләргә хаҗәтлек аеруча дип уйлыйсыз? Әнә шул сорау белән без берничә шәһәрдәшебезгә мөрәҗәгать иттек һәм алардан менә шундый җаваплар алдык.

Венера Гозәерова:

- Миңа калса, җәмәгать туклануындагы һөнәрләр кайчан да кирәкле. Чөнки адәм баласына көн дә тукланырга кирәк.

Ләйсән Идрисова:

- Социаль өлкә хезмәткәрләре генә түгел, укытучылар да кирәк. Әмма бу һөнәрне сайлаучылар сирәгәя бара. Ә бит иң беренче төпле белемне без мәктәптә алабыз.

Рөстәм Мусин:

-Минем уйлавымча, эретеп ябыштыручы, токарь хезмәтенә мохтаҗлык зур. Бүгенге яшьләрнең көн буена станок артында басып торасы килми. Барсы да юристлыкка, икътисадчы булырга укый. Ә алар хәзер җитеп ашкан.