Бәйрәм белән, хөрмәтле Азнакай нефтьчеләре!

Хөрмәтле нефтьчеләр, нефть һәм газ сәнәгате ветераннары, хөрмәтле якташлар!

Сезне «Татнефть» ААҖ генераль директоры Шәфәгать Тәхаветдинов, ТР Дәүләт Советы депутатлары, «Азнакайнефть» идарәсе коллективы исеменнән Республика, Нефтьчеләр һәм газ сәнәгате хезмәтчәннәре көннәре һәм Татарстан нефтенең 70 еллыгы белән чын күңелдән тәбрик итәм.

Әлеге истәлекле дата артында безнең компания һәм идарәнең генә түгел, илебез нефть сәнәгате үсешендәге, регион һәм республиканың алга китешендәге мөһим этапларның данлыклы тарихы да тора. Бүгенге уңышларыбыз - барлык буын нефтьчеләрнең уртак казанышы. Шулай да илнең икътисадын сугыш какшаткан заманда нефть тармагына нигез салган, җир асты хәзинәсенә беренче юл ярган ветераннарыбызның керткән өлеше гаять зур. Моның өчен аларга җиткерәсе рәхмәтнең чиге юк.

Нефтьчеләр алдында бүген эшләп килүче җитештерү чараларын үзгәртеп кору, яңаларын булдыру, күмер водороды чималын табуны камилләштерү, аның яңа ятмаларын үзләштерүгә юнәлдерелгән инвестиция проектларын тормышка ашыру мәсьәләләре тора.

Һөнәри бәйрәмебез - Нефть һәм газ сәнәгате хезмәтчәннәре көнен, нефтьчеләребез лаеклы каршылый. «Татнефть» ААҖ елына 26 млн тоннадан артык нефть чыгарса, шуның 3 млн 490 мең тоннасы (13,96 проц.) - безнең коллектив өлеше. Узган 8 айда идарә 2 млн 324 мең тонна күмер водороды чималы тапты. Шуның 58 мең тоннасы - планнан тыш. Җир токымнары бораулау, скважиналарга капиталь ремонт ясау, катламнарның нефть бирүчәнлеген күтәрү һәм башка юнәлешләр буенча булган күрсәткечләр дә уңышлы үтәлде. Яңа төзелгән скважиналардан нефть алу буенча да идарә алдынгылар рәтендә бара. Аларның һәрберсе тәүлегенә уртача 11 тонна нефть бирә.

Әлеге уңышлар өчен нефтьчеләребезгә, белгечләребезгә, төрдәш предприятие, сервис компаниясе коллективларына, буровикларга, транспортчыларга, төзүчеләргә, район халкына ихлас рәхмәтемне белдерәм. Сезне алда торган зур һәм истәлекле бәйрәмнәр белән тәбрик итәм. Ныклы сәламәтлек, күңел күтәренкелеге, бәхет һәм иминлек телим!

Рәзиф ГАЛИМОВ,

«Азнакайнефть» идарәсе җитәкчесе,

ТР Дәүләт Советы депутаты