Азнакайда радиация куркынычсызлыгына тикшерү үтмәгән чыганаклар бар

Районда 55 торак пунктын хуҗалык һәм эчәр өчен су белән тәэмин итеп торучы 117 су җыю урыны бар.

Әмма аларның барсына да хас проблемалар: су челтәре тузган, су чыганаклары санитар таләпләргә туры килеп бетми.

Авыл җирлекләрендәге үзәкләштерелгән су чыганакларында санитар-химик, микробиологик һәм радиация күрсәткечләренә тикшерү үткәрүгә игътибарны көчәйтү сорала.

Карамалы, Әсәй, Митрәй, Әгерҗе, Мәсгут, Сукаеш, Микулино,Уразай, Чәкән, Урсай, Бирючевка авылларында, Җиңү бистәсендә районыбыз эпидемиологлары алып барган тикшерүләр аларда суның каты, юшкынлы булуын, сульфат, нитрат, хлоридның нормадан 2-4 мәртәбә артып китүен күрсәтә.

Җирлегебездә шулай ук радиация куркынычы күрсәткечләре буенча тикшерү үткәрелмәгән чыганаклар булуын да әйтергә кирәк.