Азнакайда медик-социаль экспертиза хезмәтенең яңа бинасы ачылды

Районыбызда тагын бер куанычлы вакыйга булды: Азнакай шәһәрендә медик-социаль экспертиза хезмәтенең яңа бинасы ачылды.

Россия Хезмәт министрлыгының Татарстан буенча төп медик-социаль экспертиза бюросының әлеге 19нчы федераль учреждениесе Азнакай, Ютазы һәм Баулы районнарында яшәүчеләргә хезмәт күрсәтәчәк.

Аны ачу тантанасында әлеге районнарның җитәкчеләре, Татарстан Республикасында Кеше хокукларын яклау буенча уполномоченный Сәрия Сабурская, Дәүләт Советы депутаты, республиканың инвалидлар җәмгыяте рәисе Рифат Ганибаев, Татарстан буенча медик-социаль экспертиза төп бюросы җитәкчесе Ригель Низамов, Россия Хезмәт министрлыгының Татарстан буенча төп медик-социаль экспертиза бюросы каршында эшләп килүче иҗтимагый совет әгъзалары, шәһәр халкы катнашты.