Азнакайда Өлкәннәр айлыгы старт алды

Барыбыз өчен дә иң якты, җаннарны җылыткан бәйрәм - Өлкәннәр көне якынлаша. Без бу көнне өлкән буын вәкилләре алдында баш иеп, чиксез рәхмәтләребезне, аларга булган хисләребезне кадер-хөрмәт аша җиткерәбез. Районыбызда айлык игълан итеп, өлкәннәребез белән күптөрле чаралар уздыру инде шактый дәверләрдән бирле матур гадәт булып килә. Быел ул 15 сентябрьдән 15 октябрьгә кадәр дәвам итәчәк. Барлык райондашлар, хезмәт коллективлары, яшьләребез айлык чараларында актив катнашсак иде. Безгә имин, бәрәкәтле тормыш бүләк иткән буынга ярдәмебезне, җан җылысын кызганмыйк.