Азнакай Сабантуйга көннән-көн матурлана

Милли бәйрәмебезгә шәһәребез көннән-көн матурлана, көязләнә. Яшелләндерү һәм төзекләндерү предприятиесе хезмәткәрләре чәчәкләрен инде койган лаләләрне кисеп, алар янәшәсенә петуния, сальвия, бәрхет, кашкарыйлар утырталар. Предприятиенең яшелләндерү участогы җитәкчесе Мөнирә Кәримова җәй дәвамында 200 меңгә якын берьеллык чәчәкләр утыртачакларын әйтә. Аларның яртысын яздан ук үсенте итеп үзләре әзерләгән, калганын орлыктан үстерәләр. Шәһәребезне гөлгә күмгән 14 хезмәткәр әнә шулай һәр көн иртәнге дүрттән эштә. Күрәсездер, җәмәгать, Ленин, Болгар, Шәйхетдинов урамнары аллы-гөлле чәчәкләр эчендә, быел аларны чүлмәкләргә дә шактый утыртканнар.