Азнакай районының "Форпост" оешмасы башкаладан бүләкләр белән кайтты

Районның "Форпост" җәмәгатьчелек иминлеген саклаучы иҗтимагый оешмасы башкаладан зур бүләкләр белән кайтты. Республиканың иң яхшы "Форпост" үзәге исеменә барган бәйгедә еллык нәтиҗәләр буенча иң яхшы күрсәткечләргә ирешеп, безнекеләр беренче урынны яулады. Үзәк директоры Айрат Батыров күпьеллык һәм нәтиҗәле эшчәнлеге, яшьләр хәрәкәтен җәелдерүдә куйган тырышлыгы өчен Татарстан Республикасы Дәүләт Советы рәисе Фәрит Мөхәммәтшинның Рәхмәтенә лаек булды. Лениногорск политехник көллиятенең Азнакай филиалы каршында "Маяк" һәм "Авангард" отрядлары эшен югары дәрәҗәдә оештырган педагоглар Зенфира Мифтахова һәм Флорида Кадыйровага республиканың "Форпост" җитәкчелеге Мактау грамоталары тапшырылды.