Өлкәннәр баш-аяк эшкә, балалар укуга чумган. Сез балагыз белән соңгы вакытта кайчан табигатькә чыктыгыз, шашка-шахмат уйнадыгыз, бергәләп чаңгы шудыгыз? Мөгаен, күпчелек әтиләр бу сорауга уңай җавап бирә алмас иде. Ә бит балага, аеруча малай кешегә, әти тәрбиясе, аның белән даими аралашу бик мөһим. Районыбыз мәктәпләрендә оешкан Әтиләр берлеге үз улларына гына түгел, әтисез балаларга да үрнәк тәрбия бирүне күздә тота. Соңы елларда бу берлекләр уңышлы гына эшләп килә. Әле шушы көннәрдә Җиңү бистәсе мәктәбендә Әтиләр берлеге әгъзалары катнашында чаңгы ярышлары узды.