Егет кешегә җитмеш төрле һөнәр дә аз диләр. Җиңү бистәсе мәктәбендә моны күздә тотып, кечкенәдән балаларны хезмәт сөяргә һәм кул эшләренә өйрәтеп үстерәләр. Рөстәм Хәкимов җитәкчелегендә өченче елын эшләүче "Осталар" түгәрәгендә чын осталар тәрбияләнә дисәң, һич арттыру булмас. Укучылар агачтан әллә нинди могҗизалар тудыралар. Уеп та, яндырып та картиналарга кадәр иҗат итәләр. Әле менә технология буенча республика олимпиадасында катнашырга җыенулары, үз көчләре белән контактлы эретеп ябыштыру җиһазы ясаганнар.